Пред своето учество како панелистка на 8. Регионална конференција за е-трговија која ќе се одржува на 4 ноемвриво Скопје, таа зборува за автентичност, креативност и зошто иднината на модата лежи во човечката поврзаност.
Инфлуенсерите – новите архитекти на луксузот
Индустријата на инфлуенсерите бележи експлозивен раст — според Forbes, глобалните инвестиции во инфлуенсер маркетингот ја надминаа сумата од 30 милијарди долари во 2024 година, а водечките креатори заработуваат колку и филмските ѕвезди. Но, како што бројките импресионираат, еднакво толку е и интересно како брендовите го редефинираат влијанието. Малкумина го разбираат тоа подобро од Пиера Валентина Тониоло, глобална директорка за инфлуенсер маркетинг во Dolce & Gabbana, која наскоро ќе биде панелистка на 8. Регионална конференција за е-трговија во Скопје.
За Тониоло, инфлуенсерите повеќе не се „додаток“ во луксузот, туку тие се срцето на бизнисот.
„Инфлуенсер маркетингот во луксузниот сегмент повеќе не е прашање на добивање кармин на подарок и надеж за убава објава на Инстаграм,“ вели таа. „Тој стана вистински двигател на растот каде што содржината се претвора во заедница, а заедницата во трговија.“
Денешните креатори не продаваат само производи, тие создаваат култура. Од TikTok трендови што распродаваат производи за неколку часа, до нови форми на „social commerce“ како TikTok Shop и Sephora Storefront, инфлуенсерите ја избришаа границата меѓу инспирација и купување.
„Луксузот порано беше поврзан со аспирација,“ додава Тониоло, „но денес е исто толку поврзан со пристапот до приказната, до автентичната содржина и, на крајот, до производот само со еден клик.“
Глобална визија, локална автентичност
Во Dolce & Gabbana, нејзиниот тим вешто ја спојува глобалната визија со локалното чувство. „Идентитетот на брендот е нашата архитектура — силна и безвременска. Во рамките на таа структура, локалните пазари имаат слобода да го уредат својот ентериер, да изберат креатори и приказни што звучат автентично за нивната публика,“ објаснува таа.
И додека славните личности носат гламур и видливост, Тониоло верува дека малите гласови носат доверба. Според неа микро и нано инфлуенсерите се моќни затоа што нивните заедници се интимни и искрени. Кога ќе кажат „овој парфем сум јас“, луѓето им веруваат, а таквиот кредибилитет не може да се купи. Овој пристап создава двојна динамика — познатите личности градат аспирација, а малите креатори градат доверба. Кога тие две сили се спојуваат, резултатот е целосно искуство за потрошувачите: емоција, блискост и доверба.
Автентичноста како нова валута
Пред својата презентација во Скопје , наречена The Influencer Playbook Global Brands Don’t Want You To Have, Тониоло најавува дека ќе покаже како глобалните луксузни брендови навистина ги градат, мерат и развиваат своите инфлуенсер стратегии.
„Не станува збор за среќа или огромни буџети,“ нагласува таа, „туку за системи што ја балансираат креативноста со одговорноста и глобалната визија со локалната автентичност.“
Ако има една порака што сака да ја испрати, тоа е дека автентичноста останува највредната валута на денешницата — особено на пазарите во Југоисточна Европа, каде што публиката веднаш препознава што е „вистинско“, а што е „вештачко.“
